Квартараро го замени Маркез во Германија и издоминира на Захсенринг

Марк Маркез е недопирлив за ривалите кога се вози на Захсенринг и важи за владетел на оваа патека, но во негово отсуство, доминантен за конкуренцијата беше Фабио Квартараро.

Возачот на Јамаха докажа дека е возач со најдобар ритам и во најдобра форма и оваа натпреварувачка сезона, па со вакви изданија како ова денеска, доста лесно може да стигне и до втората шампионската титула во Мото ГП шампионатот.

Маркез поради нова операција на раката беше принуден да ја пропушти овогодинешната трка за Големата награда на Германија, која не донесе никаква неизвесност и во негово отсуство, бидејќи Кваратаро беше недофатлив за останатите.

Французинот издоминира и со пет секунди предност заврши пред сонародникот Жоан Зарко, додека на крајот пиедесталот го комплетираше Џек Милер, а не Алеиш Еспаргаро.

Шпанецот направи грешка на крајот и му ја „отвори вратата“ на Милер, па возачот на Дукати го искористи тоа и се избори за место на подиумот во Германија. Со победата, Квартараро ја зголеми предноста во генералниот пласман и засега сигурно ита кон одбрана на шампионскиот статус, а втор во поредокот и натаму останува Еспаргаро и покрај денешната грешка.

Денеска покрај споменатите четворица, во првите десет завршија и Лука Марини, Хорхе Мартин, Бред Биндер, Фабио Ди Џанантонио, Мигуел Оливеира и Енеа Бастијанини.