Кузмановски посочи што било пресудно за поразот од Словенија: Самите сме виновни

За „Дерби“ од Унгарија,
Ристе Влахов

Филип Кузмановски беше еден од најдобрите поединци во македонската ракомента репрезентација на отворањето на Европското првенство, бидејќи придонесе во дефанзивен, но и во офанзивен план со петте постигнати гола во мрежата на Словенија.

Македонскиот бек даде доста важни гола во моменти кога се враќавме во игра во второто полувреме и беше главен креатор на играта во напад, па по мечот и поразот кој носи измешани емоции, призна дека ќе му биде потребно еден ден за да спласнат импресиите и да даде поточен коментар за воведниот натпревар со Словенија.

– Искрено, немам коментар, уште сум под еуфорија бидејќи верував во победа над Словенија. Да не направевме технички грешки, ќе победевме. Добро е што покажавме дека можеме, овие млади играчи навистина можат.

– Отсуството на Кире беше хендикеп за нас, капитенот многу ни фали во играта, но ние се боревме и на крајот сами се си виновни што загубивме.

– И покрај тоа, главите горе, да ги поправиме техничките грешки на следните два натпревари и да одиграме уште поборбено. Ова е добра репрезентација, ние сме млад тим и трчаме 60 минути напред-назад. Видовте дека можеме да играме, оваа млада генерација докажа дека може, да анализираме каде погрешивме и да се поправиме. Нема простор за разочарување, одиме на следниот меч да го дадеме максимумот, – изјави Кузмановски.