Кузмановски: Покажавме дека сме вистинска репрезентација, но нема да потцениме никого

Македонија направи голем пресврт против Фарските Острови и успеа да завери билет за Светското првенство, но пред да дојде на ред мундијалот, Кирил Лазаров и неговите играчи ќе го почнат новиот квалификациски циклус за Европско првенство.

Нашата најсилна репрезентација влегува како фаворит во претстојните дуели против Естонија и Литванија, а еден од играчите кои ги пречекуваат овие дуели во најдобра форма е Филип Кузмановски.

Редовната минутажа во Еурофарм Пелистер извонредно влијае врз самодовербата на фантастичниот бек, па тој се надева дека добрата форма од клубовите ќе успее да се пренесе и во репрезентацијата во која доста шанса добиваат млади играчи.

– Морам да ја пофалам позитивната енегрија која владее во тимот, кај сите играчи. Ме радува ракометната форма во која се наоѓаме, сакаме да продолжиме добро во уште еден квалификациски циклус. Со Фарски Острови покажавме дека сме вистинска репрезентација, вториот натпревар со „фараните“ треба да биде нашиот патоказ за иднина.

– Ние нема да потцениме никого, даваме 100 проценти на секој меч против секоја репрезентација. Играме дома на првиот меч, верувам дека заслужуваме голем број навивачи поради тоа што го имаме прикажано. Одиме чекор по чекор, ова е една млада екипа, почнавме да играме во своите клубови и сакаме добрите настапи од клупски план да ги пренесеме во репрезентацијата. Се надевам дека Македонија повторно ќе ја однесеме на еден голем ракометен настан, – изјави Кузмановски.