Кутињо прифатил двојно помала плата за да остане во Баерн

Фелипе Кутињо морал да прифати сериозно намалување на платата, за да остане во редовите на Баерн Минхен до крајот на сезоната, – тврдат германските медиуми.

Бразилецот сакал да остане во Баерн за финалето на германскиот Куп, но и за завршницата на Лигата на шампионите, па за наредните два месеца ќе добие и 50 проценти помала плата од договорот кој досега го имаше.

Кутињо настапуваше како позајмен играч од редовите на Барселона, но ако сега замине од Минхен, нема да може да настапува за друга екипа пред септември.

Баерн има опција да плати 120 милиони евра за да го откупи договорот на Кутињо, но повеќе од јасно е дека тоа нема да се случи.

Неговиот актуелен тим викендов игра во финалето на националниот куп против Баер Леверкузен, а потоа следната обврска е дури во август, за реваншот од осминафиналето на ЛШ против Челси.