Куртоа за последната акција на Реал: Покажа карактер што не им подаде на Винисиус и Мбапе! (Видео)

Реал Мадрид не игра течно и допадливо на стартот на новата сезона и европскиот шампион се мачеше и на првиот меч во Лигата на шампионите, но сепак со два доцни гола успеа да го положи испитот наречен Штутгарт.

Гостите од Германија беа далеку подобри во првиот дел и не поведоа само поради бравурозните одбрани на Тибо Куртоа, а откако падна по еден гол до средина на второто полувреме, победникот се решаваше во самата завршница.

Ридигер во свој стил погоди по еден корнер и донесе предност од 2:1, а пред последниот судиски свиреж, конечните 3:1 ги постави резервистот Ендрик.

Младиот Бразилец засега добива симболична минутажа од Карло Анчелоти, но со своите потези се повеќе доаѓа до израз и покажува дека заслужува и поголема шанса.

Ендрик постигна гол со разорен шут со левата нога во ситуација кога ги имаше Винисиус и Мбапе на левата и десната страна, но наместо да ги проигра, покажа храброст и тоа му се исплатеше.

– Ако не дадеше гол, ќе го убиев…… Но, тој постигна гол и ги замолкна сите кои во моментот подготвуваа критики. Ендрик има голема самодоверба и шут кој е неверојатно силен. Покажа карактер што не им ја додаде топката на Винисиус и Мбапе, – изјави Куртоа, кој беше избран за МВП на натпреварот.