Куња промаши зицер за реми во финишот, Баерн ја победи Херта (Видео)

Роберт Левандовски не реализираше пенал, но Баерн Минхен успеа да победи на тешкото гостување кај Херта (0:1) и ја продолжи победничката серија во Бундеслигата.

Првата голема шанса за Баварците не ја искористи полскиот репрезентативец, чиј пенал во 12 минута беше одбранет од Јарстајн, но Херта немаше среќа девет минути подоцна.

Ударот на Коман закачи еден од дефанзивците на берлинскиот тим и топката доби траекторија која домашниот голман не можеше да ја спречи и заврши во неговата мрежа.

Херта се обидуваше да израмни, во финишот за оваа екипа дебитираше и Сами Кедира, но најголемата шанса ја пропушти Куња во 89. минута.

Напаѓачот на домашниот тим излезе очи в очи со Мануел Нојер и реши да го префрли искусниот голман, но поткопаната топка го промаши цел гол и Баерн на крајот ги освои трите бода.

Лидерот веќе има 48 бодови, десет повеќе од РБ Лајпциг кој има натпревар помалку, додека Херта останува на долниот дел на табелата со само 17 бодови.