„Кралевите“ повлекоа (не)очекуван потег: Браун доби отказ од Сакраменто

Мајк Браун заработи отказ од тренерската позиција во Сакраменто Кинг, информираат американските медиуми.

Искусниот Браун пред само неколку месеци доби нов договор според кој требаше да ја води екипата најмалку до 2027 година, меѓутоа во спортот работите брзо се менуваат и ова е најдобра потврда за тоа.

Имено „кралевите“ имаат учинок од 13 победи и 18 порази на 31 меч во оваа сезона во НБА лигата, резултат кој е далеку од амбициите, поставените цели и раководството на Сакраменто се одлучи да реагира и да заборави на се што Браун направи добро во минатата сезони.

Имено Мајк во натпреварувачката 2022-2023 беше прогласен за тренер на годината и тоа откако успеа да му обезбеди прв плејоф на Сакраменто по 2006 година.

Тој ја завршува приказната со оваа организација со рекорд од 107-88 (победи/порази). Претходно Браун како главен тренер работеше во Кливленд Кавалирс и Лос Анџелес Лејкерс, а искуство како асистент има собирано уште во Голден Стејт Вориорс, Индијана Пејсерс, Вашингтон Визардс и Сан Антонио Спарс.