Крадци собрале сериозен плен од куќата на Румениге

Германската фудбалска легенда, Карл-Хајнц Румениге пријавил во полиција дека непознати лица упаднале во неговата куќа и заминале со вредни предмети и голема сума на пари.

„Билд“објави дека полицијата се обидува да ги идентификува лицата кои го извршиле грабежот, но засега истите не се пронајдени и лоцирани.

Грабежот се случил пред два дена, крадците влегле во куќата преку една од терасите, а заминале со вредни предмети и пари во вредност од најмалку 250.000 евра.

Румениге и неговите блиски не биле во домот, што очигледно им било добро познато на натрапниците, а останува да се види дали истрагата на полицијата ќе даде резултат.

Румениге е поранешен директор на Баерн, а во моментов е член на Бордот на директори на германскиот великан.