Костески: Покажавме дека вредиме, пресуди искуството

Македонската ракометна репрезентација минува низ транзициски период кој трае веќе неколку години, но на деннешниот натпревар против Португалија селекторот Кирил Лазаров истрча со убедливо најмлад тим.

Младите и неискусни ракометари покажаа желба и мотив за надигрување против фаворизираниот противник, па иако се вратија од четири негатива и направија пресврт во вториот дел, на крајот потклекнаа под притисокот во последните 10 минути.

Поради тоа, резултатот 23:29 не ја отсликува реалноста за тоа што беше видено на теренот, но факт е дека момците на Лазаров ќе мора да работат на физички и психолошки план, бидејќи слично паѓаа во завршниците и на натпереварите на Светското првенство.

– Направивме и пресврт на натпреварот, одигравме борбено до крај и мислам дека ова беше машки натпревар. Покажавме дека вредиме против ваква Португалија, бидејќи сите знаеме за каква репрезентација станува збор.

– Жал ми е, имавме добри 50 минути, но на крајот пресудија последните 10 минути во кои до израз најверојатно дојде искуството. Не успеавме да изненадиме, но одиме во Португалија да одиграме уште еден добар натпревар, да се спротивставиме најдобро што можеме и да ја минеме оваа група, – изјави крилото Ненад Костески.