Костадинов: Сите плачевме по говорот на Пандев

Македонскиот репрезентативец Тихомир Костадинов ја промени клупската средина и во иднина ќе настапува во Пјаст Гливице.

Поради овој потег Костадинов е интересен за полските медиуми кои меѓу другото сакаат да дознаат нешто повеќе за Македонија, односно историскиот настап на Европското првенство кое се играше минатото лето.

-Тоа беше неверојатно искуство. Македонија е мала земја, беше голема чест да се игра на ЕП, заслуживме да бидеме на тој настан. После бараж со Грузија не можевме многу да славиме поради тоа што имаше карантин. Имаше голема забава во Скопје, но тоа не траеше многу поради пандемијата, -истакна Костадинов кој обелодени дека капитенот Горан Пандев имал емотивен говор во Тбилиси, говор по кој плачеле сите репрезентативци.

-Тоа беше многу емотивен говор. Ни кажа дека би се откажал од сите медали само Македонија да се игра на ЕП. Говореше пет минути и во моментов кога ги видов соиграчите, видов дека многумина од нив плачеа, не можеа да ги задржат солзите. Излеговме на теренот и беше невозможно да го загубиме натпреварот, рече 25-годишниот Костадинов.