Кошаркарската Федерација не го послуша предлогот на МЗТ и ја прогласи сезоната за неважечка

Иако МЗТ Скопје Аеродром понуди неколку опции и решенија за да се доигра сезоната и да се добие новиот шампион на теренот, Управниот Одбор на македонската кошаркарска Федерација денеска го искажа својот дефинитивен став со кој секако ги разочара аеродромци.

За првпат во историјата на Првата македонската кошаркарска лига, една сезона ќе заврши без шампион, откаков одговорните луѓе предводени од Перо Антиќ донесоа конечна одлука за завршување на првенството без да се додели титулата. Исто така, нема да има тимови кои ќе испаднат во втора лига, но затоа елитата во наредната сезона ќе биде проширена за два тима, односно ќе бидат промовирани водечките од втората лига.

– По доставениот предлог до членовите на УО на Кошаркарската Федерација на Северна Македонија и нивно гласање, со убедливо мнозинство е донесена одлука за завршување на Првата лига, да не се прогласи шампион за оваа натпреварувачка сезона, да нема испаѓање во понизок ранг, а две екипи од Втората лига да се промовираат во прволигаши , – гласи соопштението објавено од Федерацијата.

Инаку, треба да се напомене дека претходно и клубовите изгласаа дека сезоната треба да биде прогласена за неважечка, а во дадената ситуација најголема штета претрпе МЗТ кој на секој начин сакаше да се бори за нова титула, односно за трофејот за кој беше главен фаворит.