Кошаркарска лекција за соседот: Македонија ја уништи Бугарија и обезбеди место во големото финале

Јуниорската кошаркарска репрезентација го продолжи својот перфектен пат на Европското првенство од Б дивизијата во Скопје, а со победата остварена над Бугарија се пласираше во финалето и воедно си обезбеди место во А дивизијата во Европа.

Селекцијата до 18 години имаше пет од пет во групната фаза, но по вчерашната доминација против Португалија, вечерва во исто темпо стигнаа и до седма победа во низа.

Врсниците од Бугарија се покажаа како недоволно квалитетни за избраниците на Горан Андреевски и оваа јуниорска репрезентација покажува дека поседува елитен квалитет, кој во иднина ќе им носи натпревари во А дивизијата.

Македонија ја уништи Бугарија во спортски смисла на зборот и славеше со 92:68, триумф кој ни носи место меѓу најдобрите во Европа на следниот континентален собир.

Пред да дојде до тоа, Македонија ќе игра финале во Б дивизијата, а во истото за ривал ќе го има подобриот од дуелот меѓу Полска и Австрија.