Конте за статусот на Осимен: Одлуката на Наполи е јасна

Наполи вчера успеа да направи драматичен пресврт на дуелот со Парма и ги освои бодовите на домашен терен, а тренерот Антонио Конте се израдува и на првиот гол на засилувањето Ромелу Лукаку.

Белгиецот сезонава дојде во Наполи како замена за Виктор Осимен, но нигерскиот напаѓач во финишот на преодниот рок не успеа да договори трансфер и сега е замрзнат од италијанскиот клуб.

Осимен не е регистриран за настап во Серија А и Конте потврдил дека тој веќе нема да настапува за Наполи.

– Ниту еден фудбалер нема да биде вратен во тимот, тие кои не се дел од проектот нема да бидат вратени во составот.

– Го направивме нашиот избор и работиме во тој правец, а јас сум задоволен од она што го направивме во преодниот рок. Во идеална ситуација ќе го продадевме Осимен, но јас и вака сум среќен, – рекол Конте.