Конте со црна серија каква што не памети 15 години: Ова не менува ништо за нас

Наполи се уште е жив во битката за титулата во Серија А и покрај тоа што бележи значителен пад во формата во последно време, нешто што беше потврдено и ова попладне на натпреварот против Венеција.

Тимот на Антонио Конте не го положи испитот наречен „финале на Светско првенство“, бидејќи самиот италијански стручњак вчера порача дека дуелот против Венеција тој го гледа како завршно сценарио на еден мундијал.

Иако Наполи беше подобар тим, на крајот се задоволи само со разочарувачко реми од 0:0, што всушност значи дека „небесно сините“ освоија само осум бода на последните седум меча во Серија А.

Денешниот нерешен резултат се надоврза на реми исхдите со Рома, Удинезе, Лацио и Интер, а во споменатиот период, Наполи забележа и една победа над Фиорентина, односно еден пораз од Комо.

Последен пат приближно црна серија како тренер Конте имал во 2010-та година, кога како тренер на Аталанта освоил само четири бода на седум натпревари.

– Задоволен сум од прикажаното, но не и од резултатот. Кога ќе создадете толку многу шанси, мора да постигнете гол. Ние не го направивме тоа, а на крајот ризикувавме да примиме еден во самата завршница. Ако се случеше тоа, ќе беше сосема друга приказна, вака и не изгледа толку лошо.

– Сега следи интернационална пауза и ќе го правиме тоа што го правиме и досега. Ќе продолжиме да работиме, ќе се обидеме да ги подобриме играчите на тактичко и физичко ниво. Ова реми не менува ништо за нас, мора да продолжиме да работиме, – изјави Конте.