Конте по разочарувачкото реми: Ова што го правиме е неверојатно

Наполи пропушти огромна шанса да отиде на „плус шест“ и да го зголеми притисокот врз Интер пред денешниот дерби натпревар против Фиорентина, откако тимот на Антонио Конте вчера само ремизираше со Удинезе на домашен терен.

Лидерот во Серија А одигра 1:1 и не успеа да постигне втор гол во мрежата на гостите, па сега предноста на Наполи може да падне на само еден бод доколку Интер вечерва го одбрани домашниот терен.

Неочекуваното реми донесе мало разочарување на стадионот „Диего Армандо Марадона“, но Конте уверува дека не смее да има таква атмосфера, особено поради тоа што смета дека тимот се надминува себеси со освоените бодови во Серија А.

– Треба да гледаме само на нашиот напредок како тим, ова беше пропуштена шанса да го зацврстиме местото во Европа наредната сезона, но реми против Удинезе и не е така лошо.

– Не смееме да ја мешаме реалноста со тоа што ние го правиме на теренот. Реалноста е едно, а тоа што го правиме ние е неверојатно. Момците го напуштија теренот исцедени, дадоа се за да стигнат до победа, но не успеаја во тоа. Ова беше деветти натпревар на кој сме без пораз, па затоа од срце велам дека ова што го правиме е неверојатно, ги надминавме сите очекувања, – потенцира Конте.