Конте ги нападна италијанските новинари за нервозата во Наполи: Ова навистина не е нормално

Наполи одигра уште еден доминантен натпревар на домашен терен, но за разлика од оној кога ремизираше против Интер, овојпат го пронајде патот до победата.

Тимот на Антонио Конте создаде доволно број шанси за да има навистина комотна победа против Фиорентина, но на крајот влезе и во тензичен период во кој триумфот зависеше само од еден гол.

Наполи сепак победи со 2:1 и го одржа чекорот со лидерот Интер, а по важниот триумф, Конте ги нападна италијанските новинари за третманот кој го имаат кон неговиот тим, бидејќи според него тие создаваат непотребен притисок.

– Ова беше заслужена победа, но мислам дека не постигнавме доволен број на голови со оглед на создадените шанси. Мораме да одиграме најдобро што можеме на секој натпревар и не треба да влегуваме во бесмислена вознемиреност. Истото ни се случи и против Интер, игравме добро и доминиравме долги периоди, се додека не се активираше нервозата кај играчите, – изјави Конте, кој смета дека причина за нервозата се токму италијанските новинари.

– Вие сте причинителите за нашата нервоза во играта. Правите ова што го остварува тимот да изгледа нормално, кога навистина не е. Ова што го правиме не е нормално, а вие правите да изгледа нормално. Имаме голем број повредени играчи, велите дека е нормално…… Најталентираниот играч си замина, и натаму велите дека тоа е нормално….. Според мене, овие момци прават нешто необично и неверојатно, – потенцира Конте.