Конечно се јави спортскиот директор на Барселона и постави ултиматум до Дембеле: Треба да си оди најдоцна до 31. јануари!

Чави Ернандес ова утро повлече потег и го отстрани Усман Дембеле од тимот на Барселона за гостувањето кај Атлетик Билбао, што беше прв јасен сигнал од тренерот дека полека го губи трпението со францускиот фудбалер.

Неколку часа по објавениот тим за вечерашното гостувањето во Купот, конечно со изјава се јави и спортскиот директор на Барселона, кој на почетокот на месец декември најави дека Дембеле ќе потпише нов договор до крајот на 2021-ва година.

Тоа не се случи, па сега Матеу Алемани испрати ултиматум и побара од Дембеле и неговите агенти да си пронајдат нов клуб во преостанатите 11 дена од зимскиот преоден рок, кога веќе е јасно дека не сакаат да го продолжат договорот со Барселона.

– Започнавме преговори со агентот на Дембеле во месец јули и од тогаш поминаа шест или седум месеци. Имавме постојани дијалози и во тој период испративме неколку понуди. Се обидовме да пронајдеме решение играчот да остане со нас, но сите понуди беа систематски одбиени.

– Сега, на 11 дена пред исткот на зимскиот преоден рок и кога играчот очигледно не сака да го продолжи договорот, го известивме дека треба да си пронајде клуб и решение до 31-ви јануари, тоа е најдобро за сите. Не сакаме играчи кои не се вклучени во проектот, – потенцира Алемани.