Колом пред дуелот со Македонија: Мора да покажеме почит кон секого, сите ривали се опасни

Селекцијата на Шпанија е прв наш ривал во мундијалските квалификации, противник со кого ќе се соочиме утре во СЦ „Јане Сандански“ во Скопје.

„Црвената фурија“ нема да може да смета на најважните играчи, главните ѕвезди од НБА и Евролигата, меѓутоа без разлика на тоа поседува квалитетен состав предводен од трофејниот стратег Серџо Скариоло. Шпанците се свесни дека се фаворити во дуелот со Македонија како и за освојување за првото место во групата во која се уште Украина и Грузија, ама во исто време знаат дека ќе мора тоа да го потврдат на теренот каде нема да потценат ниту еден противник.

-Сите ривали се многу опасни. Треба да бидеме внимателни и да ги почитуваме сите. Ова е можност уште еднаш да им покажеме на сите дека има многу добри шпански играчи. Дека националниот производ е квалитетен и дека тие можат многу да ѝ помогнат на репрезентацијата, повеќе отколку што се очекува од нив, -порача плејмејкерот Кино Колом кој е капитен на овој состав на Шпанија.