Кол за стратегот кој може да го замени Тен Хаг во Јунајтед: Тој е очигледен избор

Манчестер Јунајтед турбулентно ја почна и оваа сезона во која екипата не е константна, не може да дојде до посакуваните резултати во серија што дефинитивно е повеќе од неопходно ако се сакаат трофеи, враќање на победничките патеки.

И одново во фокусот на вниманието е менаџерот Ерик Тен Хаг за кого има доста критики, прашања и дилеми дали е време да заработи отказ од раководството на „Олд Трафорд“. Засега стратегот е убеден дека ја има поддршката од управата и е мирен, меѓутоа во фудбалот работите знаат многу брзо да се променат и за тоа имаме доста примери од минатото.

Секако има и размислувања кој би можел да седне на евентуално испразнетото столче, па така Џо Кол типува дека тоа ќе биде доскорешниот англиски селектор Герет Саутгејт.

-Саутгејт е очигледниот избор за Манчестер Јунајтед. Ако ја погледнете сопственичката група, со Ден Ешворт – тој работеше со Саутгејт во ФА и тоа всушност многу ме потсетува на времето кога Герет ја презеде Англија и мораше да ја стабилизира водата.

-Навивачите не беа задоволни, а тој успеа да ги поттикне и можеби ова е вистинското место и вистинско време за Герет и мразам да зборувам за следните менаџери кога менаџерот се уште на позиција, но навистина е тешко да се погледне Манчестер Јунајтед и – знаејќи каков е фудбалот – знајте дека тие мора да размислуваат да направат нешто, -порача Кол.