Кол за офанзивецот на Јунајтед: Се мачи во ПЛ, тој е совршен за холандската лига

Манчестер Јунајтед и понатаму треба да реши некои прашања и да создаде тим кој е конкурентен за највисоки дострели во сите натпреварувања, нешто што фановите веќе некое време со нетрпение го очекуваат.

Резултатите не се на посакуваното ниво, често има критики, играчите, менаџерот…Клубот и понатаму му верува на тренерот Ерик Тен Хаг во чиј мандат еден од фудбалерите кој пристигна, а не ги оправда очекувањата е Антони.

Бразилецот за огромна сума на пари слета на „Олд Трафорд“, меѓутоа не се покажа и сега е во втор, трет план во Јунајтед. Според Џо Кол најдобро за премиерлигашот е да се ослободи од Антони на кого едноставно не му лежи островскиот фудбал, поточно смета дека е најдобро да се врати во Холандија.

-Проблемот со Антони во Манчестер Јунајтед е што мислам дека тој е играч кој е совршен за холандската лига. Мислам дека физичката способност во Премиер лигата е нешто со што тој се бори. Тој е талентиран фудбалер со одлична техника и вештина, беше добро да се види како игра добро против Барнсли, но не гледам дека ќе има влијание во стартниот тим на Јунајтед оваа сезона и не можам да видам како ја врти својата ситуација во Манчестер Јунајтед, -порача Кол кој играше за доста клубови во кариерата меѓу кои Челси и Ливерпул.