Клоп за својот миленик во Ливерпул: Доволно е да ги погледнете неговите пасови

Јирген Клоп им даде шанса на многу млади фудбалери во Ливерпул и им овозможи да се претстават на највиско фудбалска сцена, но еден од оние кои најмногу напреднаа под водство на Германецот дефинитивно е Трент Александер Арнолд.

Десниот бек како голобрадо момче му се стави на располагање на Клоп и привлече внимание со изданијата како младинец, за потоа да добие вистинска шанса и да ја искористи истата на најдобар можен начин.

Под тренерската палка на Јирген, Трент прерасна во еден од најдобрите дефанзивци во светот, но она што посебно го издвојува од другите е точноста во пасовите и квалитетот во офанзива.

Клоп во најновото интервју признава дека Арнолд е неговиот миленик од првиот тим на Ливерпул, па понекогаш знае да седне и да изгледа видеа во кои е прикажана пас играта на Англичанецот.

– Тоа што го прави Трент е апсурдно. Понекогаш ми се допаѓаат видеата во кои се истакнуваат најдобрите потези, а понекогаш не. Сепак, видеата со Трент се неверојатни.

– Не е потребно да гледате голови, треба да ги гледате само пасовите. Доволно е да видите како ги менува страните и како го менува ритамот со едно додавање. Секој може да дава пасови, но не такви како што може Трент, – потенцира Клоп.