Кјубан: Далас е тим на Дончиќ, Кајри тоа го знае

Првиот човек на Далас Маверикс, Марк Кјубан директно посочи кој е главен играч во екипата со оглед на тоа што истата има двајца асови од светска класа, Лука Дончиќ и Кајри Ирвинг.

Дончиќ низ целата своја НБА кариера го носи дресот на Далас, додека Кајри пристигна во Маверикс во текот на минатата сезона.

-Верувам дека Кајри созреал до тој степен што знае дека ова е тим на Лука Дончиќ. Лука исто така знае дека ова е негов тим. Тоа е она што е важно. Ирвинг е подготвен да ја игра улогата на бек шутер, а кога Лука не е на теренот, имаме плејмејкер кој може да постигнува поени и да им асистира на другите. И двајцата ги подобруваат своите соиграчи, а тоа досега не сме го имале, -порача претседателот Кјубан.

Минатата сезона Ирвинг имаше просек од 27,1 поени, 5,1 скока и 5,5 асистенции, додека Дончиќ бележеше 32,4 поени, 8,6 скока и 8 асистенции.