Кјелини за заминувањето во пензија: Сигурно ќе играм уште…

Капитенот на италијанскиот шампион Јувентус, Џорџо Кјелини отворено проговори за завршувањето на активната играчка кариера.

Кјелини веќе е длабоко во четвртата деценија на неговиот живот и се поблиску е до пензија, меѓутоа ниту тој самиот засега не знае точно кога ќе ги закачи копачките на клин, поточно само една работа е сигурно-тоа е оти ќе биде сигурно активен и во натпреварувачката 2020/2021.

-Следната година ќе видам како ќе се чувствувам. Ќе играм уште една година, потоа ќе видиме. Можам да играм уште една потоа, сакам да продолжам во фудбалот затоа што тоа е мојот живот. Повеќе би сакал улога во управата отколку да бидам тренер, ама во животот никогаш ништо не се знае, -порача Кјелини кој во Јуве е од 2005 година и досега има одиграно 509 натпревари.