Кирјос соопшти разочарувачка вест неколку часа пред стартот на Вимблдон, фановите останаа пократки за гарантирано шоу

Минатогодишниот финалист на Вимблдон, Ник Кирјос нема да учествува на најновото издание на најпрестижниот тениски грен слем турнир, откако на неколку часа пред стартот на првиот меч, самиот објави дека не успеал да ја санира последната повреда.

Австралискиот тенисер важеше за еден од ретките кои можат да го предизвикаат Новак Ѓоковиќ во битката за титулата поради тоа што е специјалист за трева, но оваа вест пристигнува во најлошо можно време за него и ќе мора да почека следна прилика за да настапи во Ол Ингланд клубот.

– Навистина сум тажен што морам да се откажам од Вимблдон оваа година. При моето враќање на теренот, почувствував болка во зглобот на раката. Како мерка за претпазливост, направив скен на целата рака и покажа дека се работи за скинат лигамент.

– Дадов се од себе да бидам подготвен и да играм, и затоа многу сум разочаран што немав доволно време за да настапам на Вимблдон. Ќе се вратам како и секогаш, ја ценам поддршката од моите фанови, – порача Кирјос.

Ник минатата година ги одмерите силите со Новак во големото финале, па иако сериозно го тестираше и освои еден сет, сепак не успеа да го спречи Србинот во намерата да стигне до седмата титула.

Sorry to hear your news @NickKyrgios – wishing you a swift recovery and hope to see you back on our courts next year 🙏#Wimbledon pic.twitter.com/R0zl7i74Bd

— Wimbledon (@Wimbledon) July 2, 2023