Кирјос го откажа спектаклот со Ѓоковиќ во Мелбурн

Ник Кирјос и Новак Ѓоковиќ одиграа заедно во Бризбејн и за првпат беа на ист дел од мрежата, а доброто пријателство требаше да го заокружат со хуманитарен меч кој требаше да го одиграат на Род Лејвер арената.

Откако играа заедно на турнирот во двојки, планот беше да режираат спектакл во Мелбурн како најава за Аустралијан Опен, но сега пристигна информација дека до такво нешто нема да дојде.

Кирјос ги извести фановите дека е приморан да го откаже хуманитарниот меч со својот добар пријател, сето тоа како последица на повреда која ја заработил во пределот на абдоменот.

– За жал, нема да бидам во можност да играм против мојот добар пријател Новак Ѓоковиќ овој четврток на 9-ти јануари.

– Имав ултразвук на абдоменот и се покажа дека имам мускулна пукнатина од прв степен. Ќе одморам и ќе направам се за да бидам добар за Аустралијан Опен, – порача Кирјос.

Првиот грен слем во годината започнува на 12-ти јануари, па Кирјос ќе биде во трка со времето за да се опорави од повредата и да настапи на омилениот домашен турнир.