Кирил Георгиев го освои турнирот во брзопотезен шах во Битола

Велемајсторот Кирил Георгиев (2.583) го освои турнирот во брзопотезен шах кој се организираше во Битола, насловен како „Голд Фелиција 2024“. За него ова е втор освоен турнир во брзопотезен шах оваа година во Македонија, бидејќи во март победи и на „Алкалоид Опен“.

Специфика на турнирот беше времето за размислување од 10 минути за секој играч, плус 5 секунди за потег. По 9 одиграни кола, тој беше единствениот шахист со 8 бода, бидејќи двајца шахисти успеаја да одиграат реми. Интернационалнит мајстор Ламби Паско (2.390) од Албанија, кој загуби од Георгиев во седмото коло, на крајот со две победи во финишот се етаблираше како единствен играч со 7,5 бода и го освои второто место.

ВМ Звонко Станојоски (2.359) и ИМ Тони Лазов (2.365), обајцата членови на шампионскиот состав на ШК Алкалоид, ја предводат групата играчи со 7 бода во која има петмина шахисти, а останатите се странци: ИМ Рахул (2.246) од Индија, ИМ Сарачи (2.416)од Косово и ИМ Илир Сеитај (2.290) од Албанија.

Наградата за најдобар младинец до 18 години ја понесе Кирил Николовски (1.993) од ШК Мулти Есенс со 6 бода, додека неговиот тимски колега Андреј Иванов (1.634) е најдобар млад шахист до 14 години со 5,5 бода, а покрај тоа освои и масивни 183 рејтинг поени.

Леа Ефтовска (1.832) од ШК Алкалоид ја однесе наградата за најдобро пласирана шахистка, додека Томе Тодоровски (2.109) беше најдобриот меѓу ветераните.