Кин за дефанзивецот кој директно влијаеше врз отказот на Тен Хаг: Продолжувам да слушам дека тој е добар играч…..

Рој Кин е еден од ретките кои застана во одбрана на Ерик Тен Хаг по последните случувања на „Олд Трафорд“ и впери со прст кон играчите кои изневерија уште еден менаџер, исто како што беше случај и пред две години со Оле Гунар Солскјер.

Легендарниот Ирец тогаш велеше дека овие играчи на Јунајтед ќе го „фрлат под автобус“ било кој тренер во светот, а откако неговата прогноза се исполни и со Тен Хаг, вчера му нагласи два огромни проблеми на најавениот тренер, Рубен Аморим.

Кин му предочи на Португалецот дека ќе мора да ги искоренува и поправа лошите работни навики и ужасната реализација на напаѓачите, но во обраќањето за „Скај Спортс“, посебно го подбра и дефанзивецот кој директно влијаеше врз отказот на Тен Хаг.

Диого Дало промаши празен гол во првото полувреме против Вест Хем и не му помогна на Тен Хаг да си ја задржи работата, а неговата утка очигледно посебно останала во сеќавање на Рој.

– Не е се кај тренерите, мора да се зборува и за играчите. Играчите се тие кои се клучни на теренот, тие треба да го погодат голот и да реализираат големи шанси. Имаме топ играчи кои промашуваат празни голови. Дало промаши празен гол минатата недела, а уште има луѓе кои ми велат дека тој е добар играч. Требаше да ја вметне топката во голот, може ќе ја задржеше работата за својот тренер уште неколку недели, – порача Кин, кој не беше импресиониран и од изјавата на капитенот Бруно Фернандеш, кој јавно му се извини на Тен Хаг за заработениот отказ.

– Тоа што го вели е премала утеха и е направено предоцна. Немам време да слушам бизарни изјави во стилот „те изневеривме“. На фудбалерите им се суди за тоа што го прават на теренот, а мислам дкеа Бруно не направи ништо на последните натпревари и не покажа дека е лидер, – заклучи Кин во свој стил.