Киеза „уловен“ пред летот кон Англија: Среќен сум за новата авантура, поздрав до тифозите на Јуве (Видео)

Федерико Киеза е ставен на трансфер пазарот од моментот кога Тиаго Мота пристигна во Јувентус, но иако првичниот план на клубот беше да го продаде за 30 милиони евра, брзо стана јасно дека ќе мора да ја преполови сумата која ја бара.

Самото ставање на трансфер листата ги натера клубовите да тактизираат за фудбалерот кој беше прецртан од новиот тренер, а во ситуација кога Барселона и дефинитивно процени дека нема доволно пари да го купи, италијанскиот репрезентативец ја прифати понудата од Англија.

Ливерпул и Јувентус ова утро ги прецизирале сите детали за трансферот на крилниот напаѓач, кој сега во наредните четири години ќе ги брани боите на клубот од „Енфилд Роуд“.

Висината на трансферот достигнува 15 милиони евра, а дека се е подготвено за завршните процедури ни открива и видеото кое го направија италијанските новинари.

Киеза бил уловен на аеродромот во Торино каде има закажано приватен чартер лет до Англија, па оттаму признал дека уште вечерва ќе биде во Ливерпул.

– Среќен сум и задоволен за новата авантура која е пред мене. Во оваа прилика, сакам да испратам поздрав до тифозите на Јувентус. Ви благодарам за поддршката во сите изминати години, благодарност до Јувентус, – порача Киеза кој ќе се претвори во летно засилување за Арне Слот.

Chiesa is here! 🇮🇹

pic.twitter.com/ywllzvTH63

— Anfield Edition (@AnfieldEdition) August 28, 2024