Кид е убеден: Со Ирвинг сме кандидати за титулата

Екипата на Далас Маверикс за продолжението на оваа сезона добива големо засилување во името на еден од најдобрите плејмејкери во НБА лигата, Кајри Ирвинг.

Ирвинг побара да си замине од Бруклин Нетс по што најдобар, најконкретен беше составот од Тексас кој состави пакет кој беше најприфатлив по што сега ќе имаме тандем Лука Дончиќ-Анкл Дру, тандем кој според тренерот Џејсон Кид може да донесе и пехар за Маверикс.

-Ние веруваме дека неговиот талент и неговите способности ќе нè направат подобри. Неговото доаѓање ќе ни помогне да дојдеме на позиција да ја освоиме титулата. Кога ќе ги погледнете неговите резултати во други екипи, тој победуваше, -порача Кид кој не сакаше да говори за сите контроверзности на Ирвинг во изминативе години.

-Лесно е да се погледнат сите негативни приказни, но ајде да гледаме позитивно за она што го направи на теренот и надвор од него. Ние се приближуваме на тој начин. Тој се занимава со кошарка. Тој сака да победува и сака да го тренира, ова е одлична можност за мене да имам некој таков да ни помогне, -заклучи предводникот на Далас.