КФСМ го премести цело коло поради седумдневната жалост во Македонија

Кошаркарската Федерација на Македонија денеска ја извести јавноста дека предвидената натпреварувачка рунда за претстојниот викенд нема да се одигра поради седумдневната жалост во нашата земја, поместувајќи ги сите натпревари за следниот викенд.

Регуларното 21-во коло ќе се игра викендот 29/30-ти март наместо претстојните сабота и недела, поместување кое е очекува и логично со оглед на атмосферата која владее во цела Македонија.

Пред да дојде на ред 21-то коло, КФСМ најави дека од понеделник до среда наредната недела ќе бидат одиграни уште два натпревари, оние кои беа одложени на денот на големата трагедија во Кочани.

Работнички против Куманово и Вардар против Тиквеш се двата натпревари кои ќе треба да се одиграат до 26-ти март, по што на програмата ќе следи 21-то коло.

Идентични поместувања ќе добие и целосниот распоред во другите натпреварувања под капата на КФСМ.