Кастратовиќ: Секоја екипа од Хрватска не смее да се потцени, ама ние имаме јасна цел

Екипата на Металург денеска го доби ривалот за првата квалифициска рунда во Лигата на Европа и тоа е составот на Спачва од Хрватска.

Тоа е екипа која минатото првенство го заврши на третата позиција на табелата (во отсуство на двете најсилни клубови ППД Загреб и Нексе) што секако не е за потценување, но во таборот на металурзите се свесни дека се фаворити, ама ќе мора тоа да го потврдат на терен.

–Се работи за една полудиригирана ждрепка, па можеше и да се предвиди кој би можел да биде нашиот противник. Се работи за екипата на Спачва од Винковци, која доаѓа од Хрватска, а тоа е земја која е актуелен вицешампион на Европа. Затоа не смееме да го потцениме противникот и нема да се опуштиме. Засега немаме квалитетни информации за нашиот ривал, но ќе се обидеме што е можно побрзо да успееме да дојдеме до нив.

Средбата со Спачва ќе ни биде првиот официјален натпревар во новата сезона. Сосема извесно е дека сакаме да влеземе добро во сезоната, но сакаме во следниот петнеделен период и да оформиме игра по која Металург ќе биде препознатлив. Наша примарна цел е настап во групната фаза на Лига Европа– истакна за официјалниот сајт на клубот тренерот Зоран Кастратовиќ.