Касемиро се исповеда во Англија: Речиси цела кариера играм со погрешно име на дресот!

Касемиро со напорна работа и огромен труд се избори за славата која ја доживеа како еден од најдобрите дефанзивни играчи за врска, па откако испиша историја во Реал Мадрид, сега доста брзо се адаптираше и во Англија.

Иако беше доста претпазлив на почетокот, сега Касемиро веќе е клучен играч во ростерот на Ерик Тен Хаг и со своето залагање ги воодушевува навивачите на Манчестер Јунајтед, кои денеска благодарение на интервјуто кое го направи за „Би-Би-Си“ дознаа и една интересна анегдота за Бразилецот.

Вистинското име на Касемиро е Карлос Енрике Касимиро, а искусниот фудбалер сега откри зошто речиси цела кариера игра со погрешно спелувано име на дресот.

– Сакам да зборувам за моето име. Се сеќавам дека играв натпревар за Сао Пауло и моето име беше погрешно напишано. Тие го напишаа со „Е“. Се сеќавам дека тој меч го одиграв навистина добро, па бидејќи сум доста суеверен, побарав да не го менуваат и постојано да стои Касемиро.

– Од тој момент, си остана Касемиро. Инаку, моето име е Карлос Енрике Касимиро. После тој натпревар, немаше потреба да се менува и речиси цела кариера ја играм со погрешно име на дресот, – открива Бразилецот.