Касано: Тео е вистински проблем за Милан

Поранешниот италијански репрезентативец, Антонио Касано е познат по тоа што често знае жестоко да критикува, да „пука“ без влакна на јазикот, па така сега редот му дојде на дефанзивецот на Милан, Тео Ернандес.

„Росонерите“ на хартија можеби ја имаат и најдобрата лева страна со Ернандес и Рафаел Леао, двајца асови кои кога се во топ форма едноставно се незапирливи, нерешлива енигма за противниците, меѓутоа двајцата не се константни и не придонесуваат доволно за калчолигашот во актуелнава сезона.

-Да бидеме јасни, Тео Ернандез е невидлив веќе дванаесет натпревари. Тој беше оној играч кој реваше натпревари на левата страна, имаше многу трчања и многу создаваше. Тео е иритиран и иритирачки од почетокот на сезоната, игра послабо. Многумина велат дека е најдобриот лев бек во светот, па мора да го правите она што го направивте со Леао. Правиш грешки, што е твојот проблем? Мора да се соочите со тоа.

-Ако имате проблеми или ќе ги решите со клубот или Терачано ќе игра од утре. Очекувам реакција од Пауло Фонсека, тренер кој толку многу го почитувам. Во овој момент Тео е вистински проблем за Милан, -порача Касано.