Карвахал не штеди комплименти за играч на Барса: Тој е бисер, но никој не му подари ништо во фудбалот!

Шпанија вчера победи во Осло кај Норвешка и го завери пласманот на Европското првенство во Германија, а најзаслужен за последниот триумф беше младиот фудбалер кој постави нови стандарди во селекцијата.

Гави се истакна како незаменлив играч за Барселона и шпанската репрезентатција на најрана возраст и вчера го постигна клучниот гол за победа, по кој доби комплименти и од соиграчот кој инаку му е голем ривал на клупски план.

Дани Карвахал не штедеше комплименти за 19-годишниот играч за врска, кој со својата работна етика и фудбалско знаење направи да биде лидер во „фуријата“ уште во тинејџерските години.

– Многу е лесно да се дава мислење за Гави. Тој е фудбалски бисер, има само 19 години, а веќе е незаменлив во Барселона и репрезентацијата. После ова, не мора да се додава уште многу.

– Се избори за сето тоа благодарение на напорна работа, никој не му подари ништо во фудбалот и сигурен сум дека ќе продолжи во исто темпо и во иднина, – вели десниот бек на Реал Мадрид.