Карагер за потенцијалното зимско засилување за Сити: Се прашувам дали ќе успеат…

Манчестер Сити не е во најдобар момент во актуелнава сезона, а една од причините за тоа дефинитивно се повредите и фактот дека менаџерот Пеп Гвардиола ги нема сите играчи на располагање, поточно не може соодветно да ротира во овој згуснат распоред каде се играат мечеви на секој три-четири дена.

Најголем проблем за „граѓаните“ дефинитивно е отсуството на Родри кого ќе го нема до крајот на сезоната по тешката повреда на коленото. Тој е играч за кого Сити нема соодветна замена, играч кој низ годините едноставно стана клучен за премиерлигашот и дефинитивно се поставува прашање дали клубот од Манчестер ќе се активира на пазарот и ќе донесе ново име веќе во зимскиот преоден рок.

Џејми Карагер смета дека тоа е повеќе од потребно и гласно размислува дали Сити може да го добие Мартин Зубименди, шпанскиот репрезентативец кој летово беше пред преселба во Ливерпул, на крајот остана во Реал Сосиедад, ама прашање е дали ќе оддолее на преселба во Ангија ако добие повик од Пеп Гвардиола.

-Празнината што ја остави Родри значи дека Сити мора да размислува за трансфер пазарот во јануари. Се прашувам дали ќе се обидат да успеат таму каде што Ливерпул не успеа и да го привлечат Мартин Зубименди од Реал Сосиедад, играчот за кого врвните европски скаути очигледно сметаат дека е најдобрата шестка на располагање надвор од клубовите од Лигата на шампионите. Зубименди е и замена за Родри во репрезентацијата на Шпанија, -вели Карагер за „Телеграф“.