Карагер со тип пред големото дерби на „Енфилд“: Давам прогноза која може да ме прогонува во иднина

Ливерпул запиша 17 победи на првите 19 официјални натперевари на Арне Слот како менаџер на првиот тим, но овој последниот над Реал Мадрид пристигна во најдобар можен момент.

Лидерот во Лигата на шампионите и Премиер лигата изгледа како најдобар европски тим во овој момент, а со таква самодоверба во недела ќе го пречека и големиот ривал за титулата во домашното првенство.

После четири последователни титули во Премиер лигата, Сити изгледа пораздрмано од било кога, па ако загуби во недела на „Енфилд“, Ливерпул ќе има неверојатни 11 бода предност по само 13 комплетирани рунди.

Ова можно сценарио носи големи реакции и во англиската јавноста, од каде денеска ни пристигна и една интересна изјава на Џејми Карагер.

– Со мала доза на двоумење, решив да дадам прогноза која во иднина може да ме прогонува поради „факторот Гвардиола“. Сепак, ќе го кажам следново: Ако Сити загуби од Ливерпул во недела, актуелниот шампион ќе остане без можност да ја брани титулата уште пред Божиќ, – порачува Карагер.