Капитенот Стојановски: Сакаме победнички крај на квалификациите

Македонската сениорска кошаркарска репрезентација ги започна подготовките за двата престојни меча против Шпанија и Украина во рамките на квалификациите за Светското првенство.

Првата средба ја играме на гостите, додека Украинците ќе ги дочекаме во Скопје со тоа што желбата е да забележиме барем една победа и со тоа да не останеме без позитивен резултат во овој циклус за мундијалот кој во 2023 се игра во Индонезија, Јапонија и Филипини.

–Малку сме од искусните што останавме, имаме повеќе млади. Атмосфера секогаш имало и ќе има во репрезентацијата…За натпреварите, Шпанија е со истиот состав кој играше во Македонија. Дали е ‘Б’ или ‘А’ тим, Шпанија е Шпанија, ние ќе дадеме се од себе. Најважно ќе биде да се одигра достојно и против селекција од Евролигата и Еврокупот, истакна капитенот Војдан Стојановски.

–Дома, пак, со Украина, сакаме да одиме на победа и да ги завршиме квалификациите барем со една победа. Во овој циклус научивме дека нема слаби репрезентации. Штета што цело време не сме комплетни, поради повреди и отсуство на играчи. Последен пат бевме комплетни на ЕП 2015 во Загреб, -дополнува и констатира Стојановски кој имаше напорна сезона со МЗТ Скопје.