Капело за најпроблематичниот играч: Ван Нистелрој ми порача дека цела соблекувална мириса на алкохол!

Фабио Капело е исклучително актуелен во домашната и светската јавност во овие изминати два месеци во кои како никогаш претходно се откриваат анегдоти од минатото, а легендарниот Италијанец секако е добар пример за споделување на интересни приказни.

Капело работеше во голем број фудбалски гиганти и насобра искуства и случки кои може да ги раскажува во безброј варијатни, но во последното обраќање кое го имаше за италијански „Скај Спорт“, Дон Фабио одново се наврати на најголемиот талент и најдобриот играч кој го тренираше во кариерата.

Италијанецот во повеќе наврати има нагласено дека тоа е „феноменот“ Роналдо, кој истовремено е и фудбалерот кој му создал и најмногу проблеми.

– Најголемиот талент кој го тренирав е Роналдо. Роналдо „дебелиот“ за да се разбереме подобро. Но, исто така тој беше и најпроблематичниот играч, ми создаде најмногу проблеми во соблекувалната.

– Правеше забави, секакви работи. Еднаш ми пријде Ван Нистелрој и ми кажа дека цела соблекувална во Реал мириса на алкохол, – открива Капело кој сега има фантастичен однос со харизматичниот Бразилец кој исто така е активен на социјалните мрежи за време на овој пуст фудбалски период.