Капело за најбрзиот трансфер во неговата кариера: Не ми се веруваше…

Роберто Карлос стана миленик на фановите на Реал Мадрид и му помогна на шпанскиот тим да стигне до голем број трофеи, а неговиот трансфер и натаму е мистерија за тогашниот тренер Фабио Капело.

Италијанскиот стручњак го презема Реал летото во 1996 година и токму Бразилецот беше едно од посакуваните засилувања кои истовремено пристигнаа на „Бернабеу“.

Во интервјуто за „Ел Мундо“, Капело открива дека и денеска се уште не му е јасно зошто Интер се откажал од левиот бек и тоа за смешна цена.

– Само што потпишав за Реал, се уште бев во Милано и добив повик од мојот агент, кој ми кажа дека Интер го продава Роберто Карлос.

– Јас му реков дека тоа не е точно, дека никој не е глупав да продава таков фудбалер. Но, тој инсистираше и ми ја кажа цената која не беше воопшто висока. Му реков дека ќе му поверувам само ако ми прати факс со потврда од Интер за условите за продажба на фудбалерот, а тоа се случи неколку часа подоцна. Дотогаш навистина мислев дека е шега.

– Веднаш му се јавив на Лоренцо Санц (претседателот на Реал Мадрид) и инсистирав да дојде со првиот лет, бидејќи ако се дознаеше дека Интер го продава Карлос, ќе настанеше голема војна. Следното утро договорот беше потпишан и тоа веројатно беше најбрзиот трансфер во историјата. Ваквите потези ја менуваат судбината, фудбалот понекогаш носи несфатливи ситуации, но тоа е така затоа што во него се инволвирани и луѓе кои не ги разбираат работите, – рекол Капело.