Капело за кризата во Јувентус: Џунтоли има голема вина за неуспешната сезона

Фабио Капело редовно ги коментира случувањата на италијанската фудбалска сцена, а за „Скај Спорт Италија“ го потенцирал својот став и по последниот неочекуван пораз на Јувентус од Емполи во четвртфиналето на Купот.

Искусниот стручњак и досега имаше забелешки за тренерот Тиаго Мота, а сега префрлил голем дел од вината за играта на „бјанконерите“ и на спортскиот директор Кристијано Џунтоли.

– Јуве му дозволи на Емполи да напаѓа кога сака, не видовме желба, мотивација и посветеност на фудбалерите.

– Дури и самиот Мота сфати дека играта со поголем посед не носи резултати, Јувентус имаше проблем со секоја екипа која е побрза и помотивирана на теренот, – рекол Капело во анализата за играта на „бјанконерите“.

– Менаџментот направи многу грешки, првенствено Џунтоли, кој има голема вина за неуспешната сезона. Кога се бираат фудбалери, треба да бидете сигурни дека можат да се носат со дресот кој ќе го облечат, Јувентус потроши многу пари но на погрешен начин.

– Тие сите се добри фудбалери, но никој од нив не прави разлика на теренот, – рекол Капело.