Капело за крајот на една ера: „Тика-така“ фудбалот е мртов

Прославениот италијански стратег, Фабио Капело смета дека во Катар се става крај на ерата на „тика-така“ фудбалот.

Шпанија доживеа неуспех и испадна во осминафиналето против Мароко, па Капело на ова гледа како збогум со еден систем кој направи вистински бум и долго време се користеше, даваше резултат пред се за „црвената фурија“ и Барселона.

-Нема повеќе „тики така“, нема повеќе „лажна деветка“. Шпанија тоа го покажа. Тоа е формула која може да функционира во одредени ситуации и некои натпревари, но не како систем. Присуството на централен напаѓач е клучно, -рече Капело и додаде:

-Кога поседот не е проследен со брзина, играта станува непродуктивна. Фудбалот и стилот на Пеп Гвардиола еволуираа за 10 години, а не треба да заборавиме дека Барселона тогаш во најдобрите години ги имаше Лионел Меси и Андрес Иниеста – заклучи дон Фабио.