Капело воодушевен од еден италијански тим: Комотно можат да се натпреваруваат во Премиер лигата

Фабио Капело стандардно ги анализира настапите на италијанските екипи во Европа, а по одиграните средби во трите натпреварувања, легендарниот стручњак посебно се задржа на најелитното.

Лигата на шампиони секогаш го носи најдобриот и највалитетен фудбал на стариот континент, но ако треба да се издвои еден италијански тим кој воодушевува со своите настапи во Европа, тоа дефинитивно е Аталанта.

Победникот од ланската сезона во Лигата на Европа продолжи да брилјира и во Лигата на шампиони, а по последната победа остварена над Јанг Бојс со резултат 1:6, Капело испорача интересен заклучок.

– Аталанта игра фудбал со интензитет кој е достоен за Лигата на шампиони, или Премиер лигата. Со оглед на нивниот стил на игра и интензитетот кој го наметнува, никој нема да се чуди ако Аталанта се викаше Аталанта Сити, или Аталанта Јунајтед.

– Нивната способност да играат физички фудбал ги предизвикува и другите тимови во Италија. Заслугите одат кон тренерот Гасперини, кој отсекогаш во својот стил применуваше интензитет и одредена агресивност. Оваа Аталанта комотно може да се натпреварува во Премиер лигата, – вели Капело.