Капело стравува за летното засилување на Јунајтед: Тој се уште мисли дека е во Италија……

Фабио Капело им обрнува големо внимание на најдобрите фудбалери во Серија А, но дел од нив ова лето решија да ја променат средината и да се испробаат во друго елитно првенство.

Федерико Киеза и Џошуа Зиркзе направија храбри чекори и се преселија во Премиер лигата која важи за моментално најсилно национално првенство во Европа, средина која според Капело ќе биде многу потешка за напаѓачот.

Капело верува дека Киеза ќе успее да се снајде и да се наметне во Ливерпул, додека од друга страна, вели дека Зиркзе ќе мора да го промени интензитетот и пристапот доколку сака да триумфира во Манчестер Јунајтед.

– Сметам дека Киеза ја има потребната брзина за да игра и да успее во Премиер лигата. Од друга страна, воочив дека Зиркзе се мачи на почетокот во Англија. Тој се уште мисли дека може да игра со интензитет како во Италија. Тоа едноставно не е возможно во Премиер лигата, – вели Капело во интервјуто за „Кориерер дела Сера“.

– Златната топка? Сметам дека оваа награда треба да замине во рацете на Родри. Имаше неверојатни перформанси во Премиер лигата, во Лигата на шампионите и на Европското првенство. Тој имаше најдобра сезона, – заклучува Дон Фабио.