Капело: Инѕаги треба да го ископира иновативниот метод на Анчелоти

Карло Анчелоти најави иновативно и невидено правило кое ќе го примени во сезоната која ќе биде најдолга за играчите во историјата на фудбалската игра, бидејќи неговиот Реал Мадрид како актуелен европски шампион може да одигра повеќе од 70 натпревари до месец јули наредната година.

Дон Карло најави дека ќе примени метод според кој играчите ќе добиваат индивидуален одмор, а Италијанецот накратко објасни и како ќе го изведува тоа во згуснат распоред во европскиот фудбал.

Анчелоти го зема за пример Винисиус Жуниор и образложи дека Бразилецот ќе добие слободни денови по некој повик од Бразил, по што нема да има потреба да се врати веднаш во Мадрид и да игра на клупски план.

Тренерот на Реал најави ваков третман за добар дел од своите репрезентативци, а сега Фабио Капело му препорачува на Симоне Инѕаги да го копира иновативниот метод на поискусниот колега.

– Методот кој го најави Анчелоти е интересен и истиот ќе ги штити играчите од повреди. Исто така, играчите ќе имаат уште поголема почит за својот тренер. Симоне Инѕаги треба да размисли и да го ископира истото. Интер има широк ростер и може да ротира со играчи. Така ќе се задржат силите за најважниот период од сезоната, – вели Капело.

Анчелоти ќе воведе невидено правило во Реал: Играчите ќе добиваат индивидуален одмор!