Кансело ја напушта Европа, Сити ќе добие 35 милиони евра за трансферот

Жоао Кансело има невообичаена кариера во која не успеа да се задржи подолго во ниту еден тим, а го носеше дресот на клубови како Барселона, Баерн Минхен, Манчестер Сити и Јувентус.

Трансферот во Сити не му донесе сигурно место во тимот на Пеп Гвардиола и постојано беше позајмуван, а се чини дека летово ќе стави крај на ваквиот вид едногодишни авантури.

Кансело кренал раце од европските клубови и ја прифатил понудата на Ал Хилал, со што ќе биде сериозно засилување на десната страна на актуелниот шампион на Саудиска Арабија, а на Сити ќе му донесе дури 35 милиони евра.

30-годишниот фудбалер ќе има можност да соработува со колегата од националниот тим Рубен Невеш, а полесна адаптација ќе му овозможат и големиот број бразилски фудбалери предводени од Нејмар.

Тренер на Ал Хилал е исто така сонародник на Кансело, односно искусниот Жорге Жезус.