Канаваро: Само еден играч од Серија А може да игра за Реал Мадрид и Манчестер Сити

Фабио Канаваро се врати во тренерските води на крајот од сезоната и успеа да го спаси Удинезе од испаѓање, но на крајот испадна дека оваа авантура е премногу кратка поради тоа што двете страни решија да ја прекинат соработката.

Канаваро во моментов повторно е слободен агент и не крие дека чека нова шанса за докажување во Серија А, па како човек кој будно ги следи случувањата во најсилната лига во родната земја, нема проблем да го посочи најдобриот играч во овој момент.

„Златната топка“ од 2006-та година смета дека Лаутаро Мартинез е единствениот вистински суперстар во Калчото во овој момент, односно единствениот кој би добил место во стартниот тим на великани како Реал Мадрид и Манчестер Сити.

– Никој не може да го доведе во прашање достигнувањето на Лаутаро. Тој ја освои Копа Америка ова лето, а претходно стана и светски шампион. Секогаш кога му е потребен на тимот, тој е тука да направи разлика.

– Се надевам дека Серија А и Интер никогаш нема да го загубат Лаутаро. Кога мислам на играчи од Серија А кои можат да играат за Реал Мадрид и Манчестер Сити, мислам само на Лаутаро и на никој друг, – вели Канаваро.