Калин остана на чекор до финалето: Ивановски загуби по тешка борба против домашниот тенисер

Калин Ивановски вчера му се реваншираше на Ламазин и се пласираше во полуфиналето на турнирот во Поатје, но за жал денеска немаше решение за уште еден домашен тенисер.

Французинот Саша Гејмар Вајенбург се покажа како последна и непремостлива пречка за нашиот најдобар тенисер, кој понуди максимална борба и жестока битка, но сепак немаше доволно сили за нов пресврт на овој турнир.

Откако претходно се враќаше против Реко, македонските тениски фанови се надеваа на ново вакво сценарио денеска, но сепак Гејма Вајенбург не дозволи такво нешто.

Калин го загуби првиот сет со убедливи 6:2, но потоа значително го подигна нивото на игра и вториот сет се одлучуваше во тајбрејкот.

После голема битка и неизвесна борба, домашниот тенисер победи со 10:8 во тајбрејкот и се пласираше во финалето на ИТФ турнирот кој се игра на тврда подлога во сала.