Калафиори воочи една главна разлика од краткиот престој во Англија: Премиер лигата не е супериорна во однос на Серија А

Рикардо Калафиори направи голем трансфер ова лето и се пресели од Болоња во Арсенал, клуб кој реши да издвои 45 милиони евра за талентираниот италијански дефанзивец.

Калафиори може да покрие повеќе позиции во одбраната и голема предност му е тоа што знае да игра со топка, нешто што го покажа и на големото дерби против Сити на кое постигна страшен гол.

Италијанскиот репрезентативец веќе го искуси англискиот фудбал и во овој краток временски интервал остави добар впечаток, но иако е многу рано да се извлекуваат заклучоци, самиот вели дека воочил една главна разлика меѓу Серија А и Премиер лигата.

– Можеби е премногу рано да се зборува било што, но имам добри импресии од првите натпревари во Англија. Навистина добро се прилагодив, а голема благодарност оди кон моите нови соиграчи.

– Не би рекол дека Премиер лигата е супериорна во однос на Серија А. Би кажал дека се работи за многу поинаква лига, главна разлика е интензитетот. Тука се игра со многу поголем интензитет, стилот на игра е поинаков. Иако многумина се сомневаа, мислам дека направив вистински чекор со трансферот во Англија, – вели Калафиори.