Кафу не може да сфати како најдобриот десен бек е резерва на СП: Секогаш е истата приказна

ВИП ложата на Бразил денеска беше исполнета од големи фудбалски легенди кои оставија своја трага во репрезентацијата, а квартот сочинет од Роналдо, Роберто Карлос, Кака и Кафу им донесе среќа на „кариоките“.

Бразил ја победи Швајцарија со 1:0 и се пласираше во осминафиналето на Светското првенство, рунда која сега ќе може мирно да ја чека без оглед на расплетот во последното трето коло во групната фаза.

Телевизиските камери посебно ја уловија реакцијата на четирите легенди по фантастичниот гол на Касемиро вреден победа и три бода, но англиската јавност издвои една изјава која ја даде Кафу поврзана за дефанзивецот кој е еден од најдобрите, а не игра на Светското првенство во Катар.

– За мене Арнолд можеби е најдобар десен бек, не знам зошто не игра. Тој поседува се што треба да има еден десен бек. Квалитет, дриблинг, брзина. За жал, секогаш е истата приказна, велат дека не сте доволно добри во одбрана и останувате надвор од тимот. Некој сакаше да измислува исти приказни за мене и Карлос, но ние освоиме доста работи.

– Говорејќи генерално за бековите, морам да кажам дека изгледаат доста роботизирани во денешно време. Само ја добиваат топката, додават и трчаат безглаво. Нема движење без топка и не гледам двојни додавања од нивна страна, – се пожали Кафу.