Кадетите продолжија со победничката низа на ЕП во Скопје

Кадетската репрезентација ја запиша и петтата победа на Европското првенство од Б дивизијата кое се игра во Скопје, па сега е се поблиску до обезбедување на деветтото место.

Поразот од Естонија за жал ги остави кадетите без настап во четвртфиналето, но и после ова разочарување, нашите млади кошаркари покажаа карактер и сега ја запишаа третата победа во низа.

Македонија е дел од разигрувањето за место од 9-та до 16-та позиција, па по триумфот остварен над Данска, денеска сигурно стигна до триумф и над Португалија.

Иако конечниот резултат не го кажува тоа (70:68), мора да се напомене дека Македонија водеше цел меч и имаше двоцифрена предност, но само на крајот се опушти и им дозволи на Португалците да се изборат за подостоен пораз.

Ѓорѓевиќ со 22 поени беше најефикасен кошаркар во нашиот тим, но извонреден беше и Алексеј Нешовиќ со дабл-дабл од 20 поени и 12 скокови.